Consultation Meeting with Kaeng Nyui O&M Bid Evaluation Committee

ກອງປະຊຸມປຶກສາຫາລືຮ່ວມກັບຄະນະກຳມະການປະເມີນ ແລະ ຄັດເລືອກການປະມູນການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນຳ້ຕົກຕາດແກ້ງຍຸຍ

ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 (ຄພສທ 2), ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບອົງການປົກຄອງເມືອງວັງວຽງ, ແຂວງວຽງຈັນ ໄດ້ຈັດກອງປະຊຸມປຶກສາຫາລືຮ່ວມກັບຄະນະກຳມະການປະເມີນ ແລະ ຄັດເລືອກການປະມູນການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນຳ້ຕົກຕາດແກ້ງຍຸຍຂຶ້ນ ໃນວັນພະຫັດ ທີ 20 ມິຖຸນາ 2024 ທີ່ໂຮງແຮມເອສວັງວຽງບູຕິກ, ເມືອງວັງວຽງ, ແຂວງວຽງຈັນ ໂດຍການສະໜັບສະໜູນຂອງທະນາຄານພັດທະນາອາຊີ. ກອງປະຊຸມໄດ້ດໍາເນີນໂດຍການເປັນປະທານຂອງ ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ, ຜູ້ຈັດການໂຄງການ ຄພສທ 2, ກະຊວງ ຖວທ, ທ່ານ ບຸນຈັນ ມາລາວົງ, ເຈົ້າເມືອງໆວັງວຽງ ແລະ ທ່ານ ສູນ ມະນີວົງສ໌, ຫົວໜ້າໂຄງການ ຄພສທ 2, ກະຊວງ ຖວທ.

ຜູ້ເຂົ້າຮ່ວມແມ່ນປະກອບມີຄະນະຮັບຜິດຊອບໂຄງການ ຄພສທ 2, ຊ່ຽວຊານໂຄງການ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ, ພະແນກ ຖວທ ແຂວງວຽງຈັນ ແລະ ຄະນະກໍາມະການປະເມີນ ແລະ ຄັດເລືອກການປະມູນຄື ຫ້ອງການ ຖວທ ເມືອງວັງວຽງ, ຫ້ອງການແຜນການ ແລະ ການລົງທຶນເມືອງ, ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ, ຫ້ອງວ່າການປົກຄອງເມືອງ, ຫ້ອງການອຸດສາຫະກຳ ແລະ ການຄ້າເມືອງ, ຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງ, ຫ້ອງການການເງິນເມືອງ, ຫ້ອງການກະສິກຳ ແລະ ປ່າໄມ້ເມືອງ ແລະ ອົງການປົກຄອງບ້ານນາດ້ວງ.

ທ່ານ ວິລະ ຈັນທະວົງ, ຊ່ຽວຊານໂຄງການ ໄດ້ນຳສະເໜີຈຸດປະສົງຂອງການບໍລິຫານຄຸ້ມຄອງ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນຳ້ຕົກຕາດແກ້ງຍຸຍ, ຜົນໄດ້ຮັບຂອງກອງປະຊຸມຄັ້ງຜ່ານມາ, ເອກະສານແຈ້ງເຊີນເຂົ້າຮ່ວມການປະມູນ ແລະ ເງື່ອນໄຂໃນການຄັດເລືອກ.

ຫຼັງຈາກນັ້ນ, ກອງປະຊຸມໄດ້ຮັບຟັງການຜ່ານບົດສະເໜີໂຄງການໂດຍຫຍໍ້ຂອງບໍລິສັດວັນເດີຟູນລາວຈຳກັດ ໂດຍສົມທຽບກັບບັນດາເງື່ອນໄຂໃນການຄັດເລືອກທີ່ໄດ້ກຳນົດ ແລະ ຜູ້ເຂົ້າຮ່ວມໄດ້ປະກອບຄຳຄິດຄຳເຫັນຕໍ່ກັບບົດສະເໜີໂຄງການດັ່ງກ່າວ.

ກອງປະຊຸມເຫັນດີເປັນເອກະພາບໂດຍພື້ນຖານວ່າ ບົດສະເໜີໂຄງການໂດຍຫຍໍ້ຂອງບໍລິສັດທ່ອງທ່ຽວວັນເດີຟູນລາວຈຳກັດ ແມ່ນມີຄວາມຖືກຕ້ອງ ແລະ ມີເງື່ອນໄຂທີ່ຄົບຖ້ວນ. ມີຄວາມເປັນໄປໄດ້ວ່າຈະໄດ້ຮັບການຄັດເລືອກເພື່ອຮ່ວມບໍລິຫານຄຸ້ມຄອງ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນຳ້ຕົກຕາດແກ້ງຍຸຍ.

ທິດທາງແຜນການໃນຕໍ່ໜ້າ:

ກະຊວງ ຖວທ ຈະເຮັດແຈ້ງການຫາຫ້ອງການ ຖວທ ເມືອງວັງວຽງ ກ່ຽວກັບການແຈ້ງເຊີນບໍລິສັດວັນເດີຟູນລາວ ແລະ ຄະນະກຳມະການປະເມີນ ແລະ ຄັດເລືອກການປະມູນ ເຂົ້າຮ່ວມກອງປະຊຸມໃນວັນສຸກ ທີ 28 ມິຖຸນາ 2024 ເພື່ອປຶກສາຫາລື ແລະ ທຳຄວາມເຂົ້າໃຈເພີ່ມເຕີມກ່ຽວກັບການລົງທຶນເພີ່ມຂອງບໍລິສັດ, ຄາດຄະເນລາຍຮັບ ແລະ ເງິນຊຸກຍູ້ພັດທະນາບ້ານ ແລະ ເງິນຊຸກຍູ້ໃຫ້ເມືອງຈາກການນຳໃຊ້ຊັບສິນຂອງລັດ. ໃນແຈ້ງການ ແມ່ນຈະລະບຸຂໍ້ມູນທີ່ຕ້ອງການໃຫ້ບໍລິສັດກະກຽມລ່ວງໜ້າສຳລັບກອງປະຊຸມດັ່ງກ່າວ.