Consultation Meeting on Nam Ngum Marina Tourist Facility Operation and Maintenance

ກອງປະຊຸມປຶກສາຫາລືກ່ຽວກັບການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວເຂດໜ້າເຂື່ອນນໍ້າງື່ມ 1

ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 (ຄພສທ 2), ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບພະແນກ ຖວທ ແຂວງວຽງຈັນ ໄດ້ຈັດກອງປະຊຸມປຶກສາຫາລືກ່ຽວກັບການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະ ຖານທີ່ທ່ອງທ່ຽວເຂດໜ້າເຂື່ອນນໍ້າງື່ມ 1 ຂຶ້ນ ໃນວັນພຸດ ທີ 21 ສິງຫາ 2024, ທີ່ຫ້ອງປະຊຸມເຮືອນພັກວົງທອງ, ເມືອງແກ້ວອຸດົມ, ແຂວງວຽງຈັນ.

ກອງປະຊຸມໄດ້ດໍາເນີນໂດຍການເປັນປະທານຂອງ ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ, ຜູ້ຈັດການໂຄງການ ຄພສທ 2, ກະຊວງ ຖວທ ຮ່ວມກັບ ທ່ານ ສີສະຫວາດ ແສງພະຈັນ, ຫົວໜ້າພະແນກ ຖວທ ແຂວງວຽງຈັນ, ຫົວໜ້າໂຄງການ ຄພສທ 2 ແຂວງວຽງຈັນ ແລະ ທ່ານ ວິລະວຸດ ປະກິດ, ເຈົ້າເມືອງໆແກ້ວອຸດົມ, ແຂວງວຽງຈັນ.

ຜູ້ເຂົ້າຮ່ວມກອງປະຊຸມມີທັງໝົດ 25 ທ່ານ, ຍິງ 7 ທ່ານ. ຂັ້ນສູນກາງແມ່ນປະກອບມີຄະນະຮັບຜິດຊອບໂຄງການ ຄພສທ 2, ຊ່ຽວຊານໂຄງການ, ຄະນະກົມ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ. ຂັ້ນແຂວງແມ່ນປະກອບມີ ພະແນກ ຖວທ ແຂວງວຽງຈັນ, ພະແນກແຜນການ ແລະ ການລົງທຶນແຂວງ, ພະແນກການເງິນແຂວງ, ພະແນກອຸດສາຫະກໍາ ແລະ ການຄ້າແຂວງ, ພະແນກກະສິກໍາ ແລະ ປ່າໄມ້ແຂວງ, ພະແນກປ້ອງກັນຄວາມສະຫງົບ (ປກສ) ແຂວງ ແລະ ຫ້ອງວ່າການປົກຄອງແຂວງ. ຂັ້ນເມືອງແມ່ນປະກອບມີ ຫ້ອງການ ຖວທ ເມືອງແກ້ວອຸດົມ, ຫ້ອງການແຜນການ ແລະ ການລົງທຶນເມືອງ, ຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງ, ຫ້ອງການອຸດສາຫະກຳ ແລະ ການຄ້າເມືອງ, ຫ້ອງການ ປກສ ເມືອງ, ຫ້ອງການກະສິກຳ ແລະ ປ່າໄມ້ເມືອງ, ຫ້ອງການການເງິນເມືອງ ແລະ ອົງການປົກຄອງບ້ານແສງສະຫວ່າງ.

ທ່ານ ວິລະ ຈັນທະວົງ, ຊ່ຽວຊານໂຄງການ ຄພສທ 2 ໄດ້ນໍາສະເໜີກ່ຽວກັບການປັບປຸງໂຄງລ່າງພື້ນຖານ ແລະ ສິ່ງອໍານວຍຄວາມສະດວກພາຍໃນສະຖານທີ່ທ່ອງທ່ຽວຢູ່ເຂດໜ້າເຂື່ອນນໍ້າງື່ມ 1, ຜົນໄດ້ຮັບຂອງກອງປະຊຸມວັນທີ 19 ທັນວາ 2023, ຂໍ້ສະເໜີຂອງໂຄງການກ່ຽວກັບຮູບແບບການບໍລິຫານຄຸ້ມຄອງ, ເງື່ອນໄຂດ້ານຄຸນວຸດທິ, ເງື່ອນໄຂການປະເມີນ, ໂຕຊີ້ວັດ, ຂັ້ນຕອນ ແລະ ໄລຍະເວລາການປະມູນ ແລະ ການກໍານົດລາຍຊື່ຄະນະກໍາມະການປະເມີນ ແລະ ຄັດເລືອກການປະມູນ.

ຫຼັງຈາກນັ້ນ, ຜູ້ເຂົ້າຮ່ວມໄດ້ປະກອບຄຳຄິດຄຳເຫັນຕໍ່ກັບບົດສະເໜີດັ່ງກ່າວ.

ທິດທາງແຜນການໃນຕໍ່ໜ້າ

– ພະແນກ ຖວທ ແຂວງວຽງຈັນ ຈະກະກຽມໜັງສືສະເໜີຂໍຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງຄະນະກຳມະການປະເມີນ ແລະ ຄັດເລືອກການປະມູນ ການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວຢູ່ເຂດໜ້າເຂື່ອນນໍ້າງື່ມ 1.

– ກະຊວງ ຖວທ ຈະກະກຽມເອກະສານການປະມູນໂດຍປັບປຸງຕາມຄຳເຫັນຂອງກອງປະຊຸມຄັ້ງນີ້ ເພື່ອລາຍງານ ແລະ ຂໍທິດຊີ້ນຳຈາກການນຳກະຊວງ ຖວທ ແລະ ການນຳແຂວງວຽງຈັນ.