Project management and Vang Vieng PIU visited potential Homestay and Community – Based Tourism (CBT) villages in Vang Vieng, Vientiane Province

General Admin

ຄະນະຮັບຜິດຊອບໂຄງການຂັ້ນສູນກາງ ຮ່ວມກັບ PIU (ໜ່ວຍງານຈັດຕັ້ງປະຕິບັດໂຄງການ) ເມືອງວັງວຽງ ລົງຢ້ຽມຢາມເປົ້າໝາຍບ້ານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ລະຫວ່າງວັນທີ 28 ກຸມພາ – 02 ມີນາ 2023, ເມືອງວັງວຽງ, ແຂວງວຽງຈັນ.

ການລົງຢ້ຽມຢາມຄັ້ງນີ້ ໄດ້ດຳເນີນພາຍໃຕ້ການນຳພາຂອງ ທ່ານ ສູນ ມະນີວົງສ໌, ຫົວໜ້າໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2, ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ ແລະ ທັງເປັນຜູ້ຈັດການໂຄງການ, ຊ່ຽວຊານໂຄງການ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ. ທ່ານ ດວງດາລາ ພວງຈັນລາ, ຮອງຫົວໜ້າຫ້ອງການ ຖວທ ເມືອງວັງວຽງ, ຄະນະໜ່ວຍງານ ແລະ ວິຊາການຈາກຫ້ອງການ ຖວທ ເມືອງວັງວຽງ.

ຜົນໄດ້ຮັບຂອງການລົງຢ້ຽມຢາມ ແມ່ນສາມາດສະຫຼຸບຫຍໍ້ໄດ້ດັ່ງນີ້:

I. ການຢ້ຽມຢາມເປົ້າໝາຍບ້ານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາ ຊົນມີສ່ວນຮ່ວມອາຊຽນ

1) ບ້ານນາດາວ (ຄຸ້ມຖໍ້າຊ້າງ)

ມີທ່າແຮງໃນການພັດທະນາໃຫ້ເປັນບ້ານການທ່ອງທ່ຽວແບບປະຊາຊົນມີສ່ວນຮ່ວມ (Community Based Tourism – CBT) ແລະ ສ້າງໃຫ້ມີເຮືອນພັກແຮມປະຊາຊົນ. ເປັນບ້ານທ່ອງທ່ຽວ, ນອນຢູ່ໃນເສັ້ນທາງ ຫຼື ວົງຈອນທ່ອງທ່ຽວຂອງບໍລິສັດ ແລະ ນັກທ່ອງທ່ຽວອິດສະຫຼະ, ມີກິດຈະກຳ ແລະ ສະຖານທີ່ທ່ອງທ່ຽວເຊັ່ນ ຂີ່ສະລີງ ແລະ ລ່ອງກົ່ງເບັ່ງຢູ່ຖໍ້ານໍ້າ, ຖໍ້າຫຼຸບ, ຖໍ້າຫອຍ, ບູລາກູນ 4, ຍ່າງປ່າ ແລະ ອື່ນໆ. ເຄີຍໃຫ້ບໍລິການໂຮມສະເຕແລ້ວ. ມີພາກທຸລະກິດໃນພື້ນທີ່ດຶງດູດແຂກມາທ່ຽວ ແລະ ສົ່ງແຂກໃຫ້ເຮືອນພັກແຮມປະຊາຊົນ.

II. ການຢ້ຽມຢາມເປົ້າໝາຍທຸລະກິດຂະໜາດນ້ອຍ ແລະ ກາງ

ໄດ້ປຶກສາຫາລືກ່ຽວກັບບັນດາບັນຫາເຫຼົ່ານີ້:

1) ແຫຼ່ງທ່ອງທ່ຽວຖໍ້ານໍ້າ

ການພັດທະນາການທ່ອງທ່ຽວແບບປະຊາຊົນມີສ່ວນຮ່ວມ ແລະ ເຮືອນພັກແຮມປະຊາຊົນຢູ່ບ້ານນາດາວ, ຄຸ້ມຖໍ້າຊ້າງ ແລະ ຄວາມຕ້ອງການດ້ານການຝຶກອົບຮົມໃຫ້ພະນັກງານ

2) ຣີສອດອ່າງສະຫວັນ

ຄວາມຕ້ອງການດ້ານການຝຶກອົບຮົມໃຫ້ພະນັກງານ ແລະ ການຮ່ວມມືລະຫວ່າງພາກທຸລະກິດ, ພາກລັດ ແລະ ໂຄງການໃນການຈັດງານສົ່ງເສີມການທ່ອງທ່ຽວ

3) ຈຸດຊົມວິວສາຍພູຜາແດງ

ການຮ່ວມມືລະຫວ່າງປະຊາຊົນ, ພາກລັດ ແລະ ໂຄງການ ໃນການປັບປຸງສິ່ງອຳນວຍຄວາມສະດວກຂະໜາດນ້ອຍ

ຫຼັງຈາກນັ້ນ, ໂຄງການຂັ້ນສູນກາງ ແລະ PIU ເມືອງວັງວຽງ ກໍໄດ້ປະຊຸມປຶກສາຫາລືກ່ຽວກັບແຜນກິດຈະກຳຂອງໂຄງການປະຈຳປີ 2023.