Consultation Meeting between Kaeng Nyui O&M Bid Committee and Selected Company

ກອງປະຊຸມປຶກສາຫາລືລະຫວ່າງຄະນະກຳມະການປະເມີນ ແລະ ຄັດເລືອກການປະມູນການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ ແລະ ບໍລິສັດທີ່ໄດ້ຮັບການຄັດເລືອກ

ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 (ຄພສທ 2), ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບອົງການປົກຄອງເມືອງວັງວຽງ, ແຂວງວຽງຈັນ ໄດ້ຈັດກອງປະຊຸມປຶກສາຫາລືລະຫວ່າງຄະນະກຳມະການປະເມີນ ແລະ ຄັດເລືອກການປະມູນການບໍລິຫານຄຸ້ມຄອງ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ ແລະ ບໍລິສັດທີ່ໄດ້ຮັບການຄັດເລືອກຂຶ້ນ ໃນວັນສຸກ ທີ 28 ມິຖຸນາ 2024 ທີ່ຫ້ອງການ ຖວທ ເມືອງວັງວຽງ, ເມືອງວັງວຽງ, ແຂວງວຽງຈັນ ໂດຍການສະໜັບສະໜູນຂອງທະນາຄານພັດທະນາອາຊີ. ກອງປະຊຸມໄດ້ດໍາເນີນໂດຍການເປັນປະທານຂອງ ທ່ານ ສູນ ມະນີວົງສ໌, ຫົວໜ້າໂຄງການ ຄພສທ 2, ທ່ານ ໂອເງິນ ປັນຍານຸວົງ, ຮອງຫົວໜ້າກົມພັດທະນາການທ່ອງທ່ຽວ ແລະ ທ່ານ ອັດສະຍາໄສ ມະນີວັນ, ຫົວໜ້າຫ້ອງການ ຖວທ ເມືອງວັງວຽງ, ຄະນະຮັບຜິດຊອບໂຄງການ ຄພສທ 2 ເມືອງວັງວຽງ.

ຜູ້ເຂົ້າຮ່ວມແມ່ນປະກອບມີຄະນະຮັບຜິດຊອບໂຄງການ ຄພສທ 2, ຊ່ຽວຊານໂຄງການ, ຄະນະກົມ ແລະ ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ, ພະແນກ ຖວທ ແຂວງວຽງຈັນ ແລະ ຄະນະກໍາມະການປະເມີນ ແລະ ຄັດເລືອກການປະມູນຄື ຫ້ອງການ ຖວທ ເມືອງວັງວຽງ, ອົງການພັດທະນາ ແລະ ບໍລິຫານຕົວເມືອງ (ອພບຕ), ຫ້ອງການແຜນການ ແລະ ການລົງທຶນເມືອງ, ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ, ຫ້ອງການອຸດສາຫະກໍາ ແລະ ການຄ້າເມືອງ, ຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງ, ຫ້ອງການການເງິນເມືອງ, ຫ້ອງການກະສິກຳ ແລະ ປ່າໄມ້ເມືອງ, ອົງການປົກຄອງບ້ານນາດ້ວງ ແລະ ບໍລິສັດທ່ອງທ່ຽວວັນເດີຟູນລາວຈຳກັດ ທີ່ໄດ້ຮັບການຄັດເລືອກ.

ທ່ານ ວິລະ ຈັນທະວົງ, ຊ່ຽວຊານໂຄງການ ໄດ້ນຳສະເໜີຜົນໄດ້ຮັບຂອງການປະມູນ ແລະ ຂໍ້ມູນທີ່ຄະນະກຳມະການປະເມີນ ແລະ ຄັດເລືອກການປະມູນ ຕ້ອງການໃຫ້ບໍລິສັດທີ່ໄດ້ຮັບການຄັດເລືອກຊີ້ແຈງຕື່ມ.

ຫຼັງຈາກນັ້ນ, ທ່ານ ບຸນພັນ ວົງສຳພັນ, ຜູ້ອຳນວຍການບໍລິສັດທ່ອງທ່ຽວວັນເດີຟູນລາວຈຳກັດ ໄດ້ຊີ້ແຈງຂໍ້ມູນເພີ່ມເຕີມ.

ທິດທາງແຜນການໃນຕໍ່ໜ້າ

– ຫ້ອງການ ຖວທ ເມືອງ ສະເໜີຂໍຂໍ້ຕົກລົງທ່ານເຈົ້າເມືອງ ວ່າດ້ວຍການເຫັນດີຮັບຮອງເອົາຜົນການເຈລະຈາກັບບໍລິສັດ ໂດຍບໍ່ຈໍາເປັນລໍຖ້າຂໍ້ມູນເພີ່ມເຕີມຈາກບໍລິສັດ.

– ກະຊວງ ຖວທ ຈະສະໜອງຂໍ້ມູນກ່ຽວກັບການບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວເຊັ່ນ ໜ້າວຽກ ແລະ ລາຍຈ່າຍໃນການບຳລຸງຮັກສາສິ່ງອຳນວຍຄວາມສະດວກໃຫ້ແກ່ບໍລິສັດ ເພື່ອເປັນຂໍ້ມູນພື້ນຖານໃນການຄາດຄະເນລາຍຈ່າຍ.

– ບໍລິສັດທ່ອງທ່ຽວວັນເດີຟູນລາວຈຳກັດ ຈະສະໜອງຂໍ້ມູນເພີ່ມເຕີມໃຫ້ແກ່ ກະຊວງ ຖວທ ເຊັ່ນ ຄາດຄະເນລາຍຮັບ, ລາຍຈ່າຍ ແລະ ເງິນຊຸກຍູ້ພັດທະນາທ້ອງຖິ່ນໃຫ້ບ້ານ ແລະ ເມືອງ (ເປັນເປີເຊັນ).

– ຫ້ອງການແຜນການ ແລະ ການລົງທຶນເມືອງ ຈະສົມທົບກັບອົງການປົກຄອງບ້ານນາດ້ວງ ເພື່ອກວດກາຄືນຂໍ້ມູນການຮ່ວມທຶນຂອງນັກລົງທຶນຜ່ານມາ.

– ກະຊວງ ຖວທ ຈະປະສານສົມທົບກັບພາກລັດຂັ້ນແຂວງ ແລະ ເມືອງ, ບໍລິສັດທ່ອງທ່ຽວວັນເດີຟູນລາວຈຳກັດ ແລະ ອົງການປົກຄອງບ້ານນາດ້ວງ ສ້າງແຜນພັດທະນາ, ຄຸ້ມຄອງ, ດໍາເນີນງານ ແລະ ບໍາລຸງຮັກສາສິ່ງອໍານວຍຄວາມສະດວກພາຍໃນສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ ພ້ອມທັງກໍານົດຂອບເຂດການພັດທະນາ (Zoning) ເພື່ອຄັດຕິດກັບສັນຍາ.

– ກະຊວງ ຖວທ ຈະຮ່າງສັນຍາລະຫວ່າງ ອົງການປົກຄອງເມືອງວັງວຽງ ແລະ ບໍລິສັດທ່ອງທ່ຽວວັນເດີຟູນລາວຈໍາກັດ ໃນການບໍລິຫານຄຸ້ມຄອງ ແລະ ບໍາລຸງຮັກສາສິ່ງອໍານວຍຄວາມສະດວກພາຍໃນສະຖານທີ່ທ່ອງທ່ຽວ.