Meeting on 2022 Workplan Implementation Progress and Plan for 2023 with Project Implementation Units (PIU)

ໃນວັນທີ 10 ພະຈິກ 2022, ກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມທົບທວນຄວາມຄືບໜ້າການຈັດຕັ້ງປະຕິບັດແຜນກິດຈະກຳປະຈຳປີ 2022 ແລະ ວາງແຜນກິດຈະກຳປະຈຳປີ 2023 ຮ່ວມກັບຫນ່ວຍງານຈັດຕັ້ງປະຕິບັດໂຄງການ ໂດຍການສະໜັບສະໜູນຂອງໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2, ທະນາຄານພັດທະນາອາຊີ.

ກອງປະຊຸມໄດ້ດຳເນີນໂດຍການເປັນປະທານຂອງ ທ່ານ ສູນ ມະນີວົງສ໌, ຫົວຫນ້າໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນຳ້ຂອງໄລຍະ 2 ແລະ ທ່ານ ນາງ ພອນມະລີ ອິນທະພົມ, ຫົວຫນ້າກົມພັດທະນາການທ່ອງທ່ຽວ, ຜູ້ຈັດການໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນຳ້ຂອງໄລຍະ 2.

ຜູ້ເຂົ້າຮ່ວມແມ່ນປະກອບມີ ໜ່ວຍງານຈັດຕັ້ງປະຕິບັດໂຄງການຈາກ 4 ເຂດເປົ້າໝາຍຂອງໂຄງການເຊັ່ນ ພະແນກ ຖວທ ແຂວງຫຼວງພະບາງ, ພະແນກ ຖວທ ແຂວງວຽງຈັນ, ຫ້ອງການ ອພບຕ ແລະ ຫ້ອງການ ຖວທ ເມືອງວັງວຽງ ແລະ ພະແນກ ຖວທ ແຂວງຈຳປາສັກ. ນອກຈາກນັ້ນ, ຍັງມີກອງເລຂາມາດຕະຖານການທ່ອງທ່ຽວອາຊຽນຂອງ ກະຊວງ ຖວທ, ທີມງານຊ່ຽວຊານ, ບັນຊີການເງິນ ແລະ ຈັດຊື້ ເຂົ້າຮ່ວມກອງປະຊຸມຄັ້ງນີ້.

ພາຍຫຼັງທັງ 4 ໜ່ວຍງານຈັດຕັ້ງປະຕິບັດໂຄງການໄດ້ລາຍງານຄວາມຄືບໜ້າການຈັດຕັ້ງປະຕິບັດແຜນກິດຈະກຳປະຈຳປີ 2022, ທ່ານ ນາງ ພອນມະລີ ອິນທະພົມ ກໍໄດ້ນຳສະເໜີກິດຈະກຳບູລິມະສິດຂອງໂຄງການປະຈຳປີ 2023 ເຊິ່ງສັງລວມໄດ້ດັ່ງນີ້:

ໝາກຜົນທີ 2: ການຈັດຕັ້ງປະຕິບັດມາດຕະຖານການທ່ອງທ່ຽວອາຊຽນ

ໂຄງການຈະສຸມໃສ່ສະໜັບສະໜູນການຈັດຕັ້ງປະຕິບັດ 3 ມາດຕະຖານທ່ອງທ່ຽວອາຊຽນຄື: 1) ມາດຕະຖານເມືອງທ່ຽວສະອາດອາຊຽນ, 2) ມາດຕະຖານໂຮງແຮມຂຽວອາຊຽນ ແລະ ມາດຕະຖານເຮືອນພັກແຮມປະຊາຊົນອາຊຽນ.

ໝາກຜົນທີ 3: ການພັດທະນາ, ສົ່ງເສີມ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ

ກິດຈະກຳຂອງໂຄງການແມ່ນປະກອບມີ ສະໜັບສະໜູນເຄືອຂ່າຍ DMN ເຊິ່ງເປັນເຄືອຂ່າຍພາກລັດ ແລະ ພາກທຸລະກິດໃນຂະແໜງການທ່ອງທ່ຽວຢູ່ຂັ້ນສູນກາງ ແລະ ເຂດເປົ້າໝາຍຂອງໂຄງການ ໃນການຈັດກອງປະຊຸມສ້າງ ແລະ ທົບທວນແຜນກິດຈະກຳ ແລະ ຈັດຕັ້ງປະຕິບັດແຜນກິດຈະກຳດັ່ງກ່າວ. ຈຸດປະສົງແມ່ນເພື່ອເຮັດໃຫ້ກິດຈະກຳຂອງໂຄງການສອດຄ່ອງກັບຄວາມຕ້ອງການຂອງພາກທຸລະກິດ ແລະ ເປັນກົນໄກໃນການຮ່ວມມືກັບບັນດາໂຄງການ ແລະ ອົງການຈັດຕັ້ງສາກົນອື່ນໃນຂະແໜງການທ່ອງທ່ຽວ. ນອກຈາກນັ້ນ, ຍັງມີການສະໜັບສະໜູນທາງດ້ານການປັບປຸງນະໂຍບາຍ ແລະ ລະບຽບການ, ແຜນແມ່ບົດພັດທະນາການທ່ອງທ່ຽວ, ການຕະຫຼາດການທ່ອງທ່ຽວ, ການນຳສະເໜີຂໍ້ມູນການທ່ອງທ່ຽວ, ການສະໜັບສະໜູນທຸລະກິດຂະໜາດນ້ອຍ ແລະ ກາງ ແລະ ການສ້າງແຜນຄຸ້ມຄອງ, ພັດທະນາ, ດຳເນີນງານ ແລະ ບຳລຸງຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວ.

ຫຼັງຈາກນັ້ນ, ທ່ານ ນາງ ອາລຸນນີ ປັນຍາສິດ, ຫົວໜ້າກອງເລຂາມາດຕະຖານການທ່ອງທ່ຽວອາຊຽນ, ຫົວໜ້າພະແນກມາດຕະຖານການທ່ອງທ່ຽວ ແລະ ບໍລິຫານ, ກະຊວງ ຖວທ ໄດ້ນຳສະເໜີ ກົນໄກການເງິນແບບຍືນຍົງເພື່ອຈັດຕັ້ງປະຕິບັດການປະເມີນ ແລະ ຢັ້ງຢືນມາດຕະຖານການທ່ອງທ່ຽວອາຊຽນ ແລະ ສປປ ລາວ. ຜູ້ເຂົ້າຮ່ວມໄດ້ປະກອບຄຳຄິດຄຳເຫັນຢ່າງຕັ້ງໜ້າເຂົ້າໃນບົດນຳສະເໜີດັ່ງກ່າວ ເພື່ອເຮັດໃຫ້ການຈັດຕັ້ງປະຕິບັດມາດຕະຖານການທ່ອງທ່ຽວຢູ່ ສປປ ລາວ ສາມາດສືບຕໍ່ດຳເນີນໄດ້ ພາຍຫຼັງໂຄງການໄດ້ສີ້ນສຸດລົງ.