National Project Steering Committee Meeting on 2023 Project Annual Workplan

ໃນວັນສຸກ ທີ 24 ກຸມພາ 2023 ທີ່ຜ່ານມາ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມຄະນະຮັບຜິດຊອບຊີ້ນຳໂຄງການເພື່ອຜ່ານແຜນກິດຈະກຳປະຈຳປີ 2023 ຂອງໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 ທີ່ກະຊວງ ຖວທ.

ກອງປະຊຸມໄດ້ດຳເນີນ ໂດຍການເປັນປະທານຂອງ ທ່ານ ອຸ່ນທວງ ຂາວພັນ, ຮອງລັດຖະມົນຕີກະຊວງ ຖວທ ເຊິ່ງທັງເປັນຫົວໜ້າຄະນະຮັບຜິດຊອບຊີ້ນຳໂຄງການ.

ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ ແລະ ຜູ້ຈັດການໂຄງການ ໄດ້ນຳສະເໜີແຜນນຳງົບປະມານຂອງໂຄງການ.

ທ່ານ ຈອຍ (Mrityunjoy Ghosh), ຫົວໜ້າຊ່ຽວຊານວຽກໂຄງລ່າງ ແລະ ທ່ານ ພົມມາ ຈັນທິລາດ, ຫົວໜ້າທີມງານວິສະວະກອນ ໄດ້ນຳສະເໜີແຜນກິດຈະກຳຂອງໂຄງການປະຈຳປີ 2023 ສຳລັບໝາກຜົນທີ 1: ການປັບປຸງໂຄງລ່າງພື້ນຖານ ແລະ ສິ່ງອຳນວຍຄວາມສະດວກ.

ຄວາມຄືບໜ້າຂອງສັນຍາກໍ່ສ້າງສາມາດສັງລວມດັ່ງລຸ່ມນີ້:

– W01: ໂຄງການປັບປຸງທາງຊອຍທີ່ບ້ານນາກະສັງ ແລະ ດອນເດດ-ດອນຄອນ: 88.29%, ຄາດຄະເນສຳເລັດການກໍ່ສ້າງ: ເມສາ 2023.

– W02: ໂຄງການປັບປຸງທາງຊອຍ ແລະ ກໍ່ສ້າງສິ່ງອຳນວຍຄວາມສະດວກສຳລັບແຫຼ່ງທ່ອງທ່ຽວເຂດໜ້າເຂື່ອນນໍ້າງື່ມ: 43.32%, ຄາດຄະເນສຳເລັດການກໍ່ສ້າງ: ມິຖຸນາ 2024.

– W03: ໂຄງການປັບປຸງເສັ້ນທາງເຂົ້ານໍ້າຕົກຕາດແກ້ງຍຸຍ. ຂົວນໍ້າຊອງ ແລະ ເສັ້ນທາງວົງແຫວນຊົນນະບົດເບື້ອງຕາເວັນຕົກຂອງສາຍນໍ້າຊອງ ເມືອງວັງວຽງ, 35.44%, ຄາດຄະເນສຳເລັດການກໍ່ສ້າງ: ກັນຍາ 2024.

– W04: ໂຄງການປັບປຸງສະໜາມຂີ້ເຫຍື້ອ ເມືອງວັງວຽງ, 67.99%, ຄາດຄະເນສຳເລັດການກໍ່ສ້າງ: ເມສາ 2024.

– W03a: ໂຄງການປັບປຸງເສັ້ນທາງຄືນໃໝ່ ພາຍໃນຕົວເມືອງວັງວຽງ, ຍັງບໍ່ໄດ້ຈັດຕັ້ງປະຕິບັດ, ຄາດຄະເນສຳເລັດການກໍ່ສ້າງ: ທ້າຍປີ 2024.

ທ່ານ ນາງ ພອນມະລີ ອິນທະພົມ ຍັງໄດ້ສືບຕໍ່ນຳສະເໜີແຜນກິດຈະກຳຂອງໂຄງການປະຈຳປີ 2023 ສຳລັບ ໝາກຜົນທີ 2: ມາດຕະຖານການທ່ອງທ່ຽວອາຊຽນ, ໝາກຜົນທີ 3: ການພັດທະນາ, ສົ່ງເສີມ ແລະ ຄຸ້ມຄອງຈຸດຫມາຍປາຍທາງການທ່ອງທ່ຽວ ແລະ ການບໍລິຫານ ແລະ ຄຸ້ມຄອງໂຄງການ.

ໝາກຜົນທີ 2: ໂຄງການຈະສຸມໃສ່

1) ມາດຕະຖານໂຮງແຮມຂຽວອາຊຽນ

2) ມາດຕະຖານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາຊົນມີສ່ວນຮ່ວມອາຊຽນ

3) ມາດຕະຖານເມືອງທ່ອງທ່ຽວສະອາດອາຊຽນ

ກິດຈະກຳແມ່ນປະກອບມີ

1) ການປະເມີນຄືນພາກສ່ວນທີ່ເຄີຍໄດ້ຮັບລາງວັນມາດຕະຖານອາຊຽນແຕ່ໝົດອາຍຸ

2) ປະເມີນເປົ້າໝາຍໃໝ່

3) ສ້າງຄວາມເຂັ້ມແຂງ

4) ປະກອບອຸປະກອນ ແລະ ປັບປຸງສິ່ງອຳນວຍຄວາມສະດວກ

5) ປະເມີນຄັ້ງສຸດທ້າຍເພື່ອສະເໜີຮັບລາງວັນໂຮງແຮມຂຽວອາຊຽນປີ 2024

ໝາກຜົນທີ 3: ໂຄງການຈະສຸມໃສ່

1) ສ້າງຄວາມເຂັ້ມແຂງໃຫ້ແກ່ເຄືອຂ່າຍ DMN (ເຄືອຂ່າຍພາກລັດ-ພາກທຸລະກິດ)

2) ປັບປຸງນະໂຍບາຍ, ລະບຽບ, ມາດຕະຖານ ແລະ ແຜນແມ່ບົດ

3) ການຕະຫຼາດ ແລະ ການໂຄສະນາ (Destination Marketing)

4) ການນຳສະເໜີຂໍ້ມູນການທ່ອງທ່ຽວ (Heritage Interpretation)

5) ການສົ່ງເສີມທຸລະກິດຂະໜາດນ້ອຍ ແລະ ກາງ (SMEs Development)

6) ສ້າງແຜນດຳເນີນງານ ແລະ ບຳລຸງຮັກສາໂຄງລ່າງພື້ນຖານ ແລະ ສິ່ງອຳນວຍຄວາມສະດວກ

.

ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 ແມ່ນໄດ້ຮັບທຶນຊ່ວຍເຫືອລ້າຈາກ ທະນາຄານພັດທະນາອາຊີ (ADB), ຈັດຕັ້ງປະຕິບັດໂດຍກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ).