National Project Steering Committee Meeting to Review 2022 Annual Workplan Implementation Progress and Plan for 2023 Annual Workplan

ໃນວັນສຸກ ທີ 09 ທັນວາ 2022 ທີ່ຜ່ານມາ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມຄະນະຮັບຜິດຊອບຊີ້ນຳໂຄງການເພື່ອລາຍງານຄວາມຄືບໜ້າການຈັດຕັ້ງປະຕິບັດແຜນກິດຈະກຳປະຈຳປີ 2022 ແລະ ທິດທາງແຜນການປະຈໍາປີ 2023 ຂອງໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 ຂຶ້ນທີ່ໂຮງແຮມຊະນະແກ້ວ, ນະຄອນຫຼວງພະບາງ, ແຂວງຫຼວງພະບາງ.

ກອງປະຊຸມໄດ້ດຳເນີນໂດຍການເປັນປະທານຂອງ ທ່ານ ອຸ່ນທວງ ຂາວພັນ, ຮອງລັດຖະມົນຕີກະຊວງ ຖວທ ແລະ ທັງເປັນຫົວໜ້າຄະນະຮັບຜິດຊອບຊີ້ນຳໂຄງການ. ຜູ້ເຂົ້າຮ່ວມປະກອບມີຄະນະຮັບຜິດຊອບຊີ້ນຳໂຄງການ, ທີມງານຊ່ຽວຊານ, ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ ແລະ PMCES.

ທ່ານ ສູນ ມະນີວົງສ໌, ຫົວໜ້າໂຄງການ ໄດ້ນຳສະເໜີສະພາບລວມ, ຄວາມຄືບໜ້າ, ເຂດເປົ້າໝາຍຂອງໂຄງການ ແລະ ການນຳໃຊ້ງົບປະມານປະຈຳປີ 2022.

ທ່ານ ພົມມາ ຈັນທິລາດ, ຫົວໜ້າທີມງານວິສະວະກອນ ລາຍງານຄວາມຄືບໜ້າການຈັດຕັ້ງປະຕິບັດແຜນກິດຈະກຳຂອງໝາກຜົນທີ 1: ການປັບປຸງໂຄງລ່າງພື້ນຖານ. ຄາດຄະເນສຳເລັດການກໍ່ສ້າງຕົວຈິງຂອງທັງ 5 ສັນຍາ ມີດັ່ງນີ້:

1) ສັນຍາ W01: ໂຄງການປັບປຸງທາງຊອຍທີ່ບ້ານນາກະສັງ ແລະ ດອນເດດ-ດອນຄອນ ຈະສຳເລັດໃນເດືອນເມສາ 2023

2) ສັນຍາ W02: ໂຄງການປັບປຸງທາງຊອຍ ແລະ ກໍ່ສ້າງສິ່ງອຳນວຍຄວາມສະດວກສຳລັບແຫຼ່ງທ່ອງທ່ຽວເຂດໜ້າເຂື່ອນນໍ້າງື່ມ ຈະສຳເລັດໃນເດືອນມິຖຸນາ 2024

3) ສັນຍາ W03: ໂຄງການປັບປຸງເສັ້ນທາງເຂົ້ານໍ້າຕົກຕາດແກ້ງຍູຍ. ຂົວນໍ້າຊອງ ແລະ ເສັ້ນທາງວົງແຫວນຊົນນະບົດເບື້ອງຕາເວັນຕົກຂອງສາຍນໍ້າຊອງ ເມືອງວັງວຽງ ຈະສຳເລັດໃນເດືອນກັນຍາ 2024

4) ສັນຍາ W04: ໂຄງການປັບປຸງສະໜາມຂີ້ເຫຍື້ອ ເມືອງວັງວຽງ ຈະສຳເລັດໃນເດືອນເມສາ 2024

5) ສັນຍາ W03a: ໂຄງການປັບປຸງເສັ້ນທາງຄືນໃໝ່ ພາຍໃນຕົວເມືອງວັງວຽງ ຈະເລີ່ມກາງ ປີ 2023 ແລະ ສຳເລັດໃນທ້າຍປີ 2024

ທ່ານ ຈອຍ (Mrityunjoy Ghosh), ຫົວໜ້າຊ່ຽວຊານວຽກໂຄງລ່າງ ລາຍງານຄວາມຄືບໜ້າການບໍລິຫານຄຸ້ມຄອງຂີ້ເຫຍື້ອຢູ່ເມືອງວັງວຽງ ຮ່ວມກັບບັນດາໂຄງການ ແລະ ອົງການຈັດຕັ້ງສາກົນອື່ນໆ.

ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ ແລະ ທັງເປັນຜູ້ຈັດການໂຄງການ ລາຍງານຄວາມຄືບໜ້າການຈັດຕັ້ງປະຕິບັດແຜນກິດຈະກຳຂອງໝາກຜົນທີ 2: ມາດຕະຖານການທ່ອງທ່ຽວອາຊຽນ ແລະ ໝາກຜົນທີ 3: ການພັດທະນາ, ສົ່ງເສີມ ແລະ ຄຸ້ມຄອງຈຸດຫມາຍປາຍທາງການທ່ອງທ່ຽວ ແລະ ນຳສະເໜີທິດທາງແຜນການບູລິມະສິດປະຈຳປີ 2023.

ຄະນະຮັບຜິດຊອບຊີ້ນຳ ແລະ ຊ່ຽວຊານໂຄງການ ກໍໄດ້ປະກອບຄຳເຫັນຢ່າງຕັ້ງໜ້າເຂົ້າໃນການນຳສະເໜີດັ່ງກ່າວ.

ພາຍຫຼັງສຳເລັດກອງປະຊຸມ, ຄະນະຮັບຜິດຊອບຊີ້ນຳໂຄງການ ຍັງໄດ້ລົງຕິດຕາມຄວາມຄືບໜ້າການກໍ່ສ້າງຫ້ອງນຳ້ສາທາລະນະ ແລະ ຫ້ອງຂາຍປີ້ເຂົ້າຊົມ ຢູ່ຫໍພິພິຕະພັນແຫ່ງຊາດຫຼວງພະບາງ ແລະ ຕີນພູສີ.

ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 ຈັດຕັ້ງປະຕິບັດໂດຍ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ສະໜັບສະໜູນໂດຍທະນາຄານພັດທະນາອາຊີ (Asian Development Bank – ADB).