Project management and Champasak PIU visited potential Homestay and Community – Based Tourism (CBT) villages in Champasak province and Southern Laos

General Admin

ຄະນະຮັບຜິດຊອບໂຄງການຂັ້ນສູນກາງ ຮ່ວມກັບ PIU ແຂວງຈໍາປາສັກ ລົງຢ້ຽມຢາມເປົ້າໝາຍບ້ານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ລະຫວ່າງວັນທີ 02 – 07 ເມສາ 2023, ແຂວງຈຳປາສັກ ແລະ ພາກໃຕ້ຂອງລາວ.

ການລົງຢ້ຽມຢາມຄັ້ງນີ້ ໄດ້ດຳເນີນພາຍໃຕ້ການນຳພາຂອງ ທ່ານ ສູນ ມະນີວົງສ໌, ຫົວໜ້າໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2, ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ ແລະ ທັງເປັນຜູ້ຈັດການໂຄງການ, ຊ່ຽວຊານໂຄງການ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ. ທ່ານ ສຸລິນ ເພັດທານີ, ຮອງຫົວໜ້າພະແນກ ຖວທ ແຂວງຈຳປາສັກ ເຊິ່ງທັງເປັນຫົວໜ້າໂຄງການຢູ່ແຂວງຈຳປາສັກ, ຄະນະຂະແໜງທ່ອງທ່ຍວ ແລະ ວິຊາການຈາກແຂວງຈຳປາສັກ.

ຜົນໄດ້ຮັບຂອງການລົງຢ້ຽມຢາມ ແມ່ນສາມາດສະຫຼຸບຫຍໍ້ໄດ້ດັ່ງນີ້:

I. ການຢ້ຽມຢາມເປົ້າໝາຍບ້ານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາ ຊົນມີສ່ວນຮ່ວມອາຊຽນ

1) ບ້ານຫຼັກສີ່ສິບ, ຕາດເຍືອງ, ເມືອງປາກຊ່ອງ

ມີແຫຼ່ງທ່ອງທ່ຽວນໍ້າຕົກຕາດເຍືອງທີ່ໂດດເດັ່ນ. ມີວິຖີຊີວິດຂອງປະຊາຊົນທີ່ສາມາດເຮັດເປັນກິດຈະກຳໄດ້ເຊັ່ນ ການຂົ້ວຊາ, ຂົ້ວກາເຟ, ເກັບສະຕໍເບີຣີ້, ເກັບຜັກ ແລະ ອື່ນໆ. ມີພາກທຸລະກິດທີ່ໃຫ້ບໍລິການໂຮມສະເຕແລ້ວເຊັ່ນ ຮ້ານກາເຟຫຼັກ 40 ແລະ ຢູ່ນີ້ໂຮມສະເຕ.

2) ບ້ານໜອງຢາເທິງ, ເມືອງປາກຊ່ອງ

ມີພາກທຸລະກິດຂາຍລາຍການທ່ອງທ່ຽວ ແລະ ໃຫ້ບໍລິການໂຮມສະເຕ (Mystic Mountain), ສາມາດຂະຫຍາຍການບໍລິການໂຮມສະເຕຢູ່ເຮືອນຂອງປະຊາຊົນ.

3) ບ້ານດອນຊົມ, ເມືອງໂຂງ

ນອນຢູ່ໃນລາຍການທ່ອງທ່ຽວພາຍເຮືອກາຍັກຂອງບໍລິສັດທ່ອງທ່ຽວ, ມີແຫຼ່ງທ່ອງທ່ຽວທາງທຳມະຊາດ ເຫວອີ່ຕູດ ທີ່ທ່ອງທ່ຽວໄດ້ໄລຍະລະດູແລ້ງ, ເດືອນພະຈິກ – ພຶດສະພາ. ປະຊາຊົນເຄີຍໃຫ້ບໍລິການເຮືອນພັກແຮມ, ເຄີຍນໍາພານັກທ່ອງທ່ຽວເຮັດກິດຈະກຳຫວ່ານແຫຍາມແລ້ງ ແລະ ໃສ່ເບັດຍາມຝົນ.

4) ບ້ານດອນລົບປະດີ, ເມືອງໂຂງ

ນອນຢູ່ໃນລາຍການທ່ອງທ່ຽວຂອງບໍລິສັດທ່ອງທ່ຽວ, ມີກິດຈະກໍາສໍາລັບນັກທ່ອງທ່ຽວເຊັ່ນ ການສານຕິບເຂົ້າ, ສານແຫສານມອງ, ຕົ້ມເຫຼົ້າ, ເຜົາບັ້ງເຂົ້າຫຼາມ, ຖີບລົດ, ແຄັມປີ້ງ ແລະ ອື່ນໆ.

II. ຢ້ຽມຢາມເປົ້າໝາຍທຸລະກິດຂະໜາດນ້ອຍ ແລະ ກາງ

1) ສະມາຄົມລົດໂດຍສານດອນເດດ, ເມືອງໂຂງ

ໄດ້ປຶກສາຫາລືກ່ຽວກັບ ການຫັດປ່ຽນມານຳໃຊ້ລົດໄຟຟ້າ, ການຄຸ້ມຄອງລົດສາມລໍ້າ (ຊາເລັ້ງ), ການສ້າງທາງລາດເພື່ອລາກກະເປົ້າເຄື່ອງຢູ່ທ່າກຳປັ່ນເກົ່າດອນເດດ, ການປູກຕົ້ນໄມ້ເພື່ອໃຫ້ຮົ່ມຢູ່ຄິດລົດໂດຍສານ, ຄວາມຕ້ອງການໃນການຝຶກອົບຮົມ ແລະ ການປັບປຸງລະບຽບຂອງສະມາຄົມ.

2) ສະມາຄົມເຮືອນາກະສັງ

ການຍ້າຍຫ້ອງຂາຍປີ້ມາໄວ້ຢູ່ບ່ອນຈອດລົດ, ການປັບປຸງລະບຽບຂອງສະມາຄົມ, ເຄື່ອງແບບຂອງສະມາຊິກ, ຄວາມຕ້ອງການໃນການຝຶກອົບຮົມ, ຄວາມເປັນລະບຽບຮຽບຮ້ອຍ ແລະ ຄວາມສະອາດຢູ່ເຂດທ່າເຮືອນາກະສັງ ແລະ ດອນເດດ.

3) ບໍລິສັດທ່ອງທ່ຽວຢູ່ດອນເດດ

ທ່າແຮງທາງດ້ານການພັດທະນາໂຮມສະເຕ ແລະ ການທ່ອງທ່ຽວແບບປະຊາຊົນມີສ່ວນຮ່ວມຢູ່ດອນຊົມ ແລະ ດອນລົບປະດີ, ການປະສານງານລະຫວ່າງສະມາຄົມເຮືອນາກະສັງ ແລະ ພາກທຸລະກິດ.

ຫຼັງຈາກນັ້ນ, ໂຄງການຂັ້ນສູນກາງ ແລະ PIU ແຂວງຈຳປາສັກ ກໍໄດ້ປະຊຸມປຶກສາຫາລືກ່ຽວກັບແຜນກິດຈະກຳຂອງໂຄງການປະຈຳປີ 2023.

ນອກຈາກແຂວງຈຳປາສັກແລ້ວ, ໂຄງການຍັງໄດ້ເດີນທາງໄປຢ້ຽມຢາມສະຖານທີ່ທ່ອງທ່ຽວທີ່ໂດດເດັ່ນຂອງແຂວງສາລະວັນເຊັ່ນ ອຸທິຍານພູຜາສຸກ, ຕາດເລາະ, ວັດປ່າຖໍ້າຜືດ ແລະ ໂຮມສະເຕ.