Project management and Luang Prabang PIU visited potential Homestay and Community – Based Tourism (CBT) villages in Luang Prabang province

General Admin

ຄະນະຮັບຜິດຊອບໂຄງການຂັ້ນສູນກາງ ຮ່ວມກັບ PIU ແຂວງຫຼວງພະບາງ ລົງຢ້ຽມຢາມເປົ້າໝາຍບ້ານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ລະຫວ່າງວັນທີ 28 – 31 ມີນາ 2023, ແຂວງຫຼວງພະບາງ.

ການລົງຢ້ຽມຢາມຄັ້ງນີ້ ໄດ້ດຳເນີນພາຍໃຕ້ການນຳພາຂອງ ທ່ານ ສູນ ມະນີວົງສ໌, ຫົວໜ້າໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2, ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ ແລະ ທັງເປັນຜູ້ຈັດການໂຄງການ, ຊ່ຽວຊານໂຄງການ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ກະຊວງ ຖວທ. ທ່ານ ນາງ ປອ ສຸດາພອນ ຄົມທະວົງ, ຫົວໜ້າພະແນກ ຖວທ ແຂວງຫຼວງພະບາງ ເຊິ່ງທັງເປັນຫົວໜ້າໂຄງການຢູ່ແຂວງຫຼວງພະບາງ, ຄະນະຂະແໜງທ່ອງທ່ຽວ ແລະ ວິຊາການຈາກພະແນກ ຖວທ ແຂວງຫຼວງພະບາງ.

ຜົນໄດ້ຮັບຂອງການລົງຢ້ຽມຢາມ ແມ່ນສາມາດສະຫຼຸບຫຍໍ້ໄດ້ດັ່ງນີ້:

I. ການຢ້ຽມຢາມເປົ້າໝາຍບ້ານເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາ ຊົນມີສ່ວນຮ່ວມອາຊຽນ

1) ບ້ານຊ່າງຄ້ອງ, ນະຄອນຫຼວງພະບາງ

ມີກິດຈະກໍາສາທິດ ແລະ ຮຽນຮູ້ການຕໍ່າຫູກ, ຜະລິດເຈ້ຍປໍສາ ແລະ ແກະສະລັກໄມ້, ມີຄອບຄົວສົນໃຈໃຫ້ບໍລິການໂຮມສະເຕ, ມີທ່າເຮືອທີ່ນັກທ່ອງທ່ຽວຈອດແວ່ຕາມເສັ້ນທາງລ່ອງເຮືອໄປ ຖໍ້າຕິ່ງ, ສາມາດນັ່ງເຮືອຂ້າມຟາກຈາກວັດຫາດສ້ຽວ, ເມືອງຈອມເພັດ, ມີເສັ້ນທາງເຂົ້າເຖິງສະດວກສະບາຍ ແລະ ໃກ້ກັບຕົວເມືອງ.

2) ບ້ານຈ່ານເໜືອ, ເມືອງຈອມເພັດ

ມີກິດຈະກໍາຢູ່ສູນຫັດຖະກໍາເຄື່ອງປັ້ນດິນເຜົາ ແລະ ຂອງພາກທຸລະກິດ, ມີໂຮມສະເຕຂອງພາກທຸລະກິດທີ່ກຳລັງຈະເປີດໃຫ້ບໍລິການ.

3) ບ້ານນາຍາງໃຕ້

ໄດ້ຮັບລາງວັນ CBT ແລະ Homestay ອາຊຽນໃນປີ 2023. ມີກິດຈະກຳສາທິດ ແລະ ຮຽນຮູ້ການຕຳ່ແຜ່ນແພ, ຍ້ອມສີທຳມະຊາດ, ຮຽນຮູ້ວິຖິຊີວິດຄົນທ້ອງຖິ່ນ, ຍາມແລ້ງ ແມ່ນມີກິດຈະກຳຍ່າງປ່າ, ເບິ່ງຊາວບ້ານກ່ຽວເຂົ້າ, ຍາມຝົນ ແມ່ນກິດຈະກຳດຳນາ, ພິທີບາສີ, ຊື່ຜະລິດຕະພັນແຜ່ນແພ ແລະ ເຫຼົ້າຂາວ.

4) ບ້ານນາ, ເມືອງງອຍ

ມີບໍລິສັດທ່ອງທ່ຽວຂາຍລາຍການທ່ອງທ່ຽວໂຮມສະເຕມາບ້ານດັ່ງກ່າວ, ມີປະຊາຊົນໃຫ້ບໍລິການໂຮມສະເຕ.

5) ບ້ານຊ່າງໄຫ, ເມືອງປາກອູ

ມີຜະລິດຕະພັນ ແລະ ກິດຈະກໍາທ່ອງທ່ຽວແບບປະຊາຊົນມີສ່ວນຮ່ວມເຊັ່ນ ການສາທິດ ແລະ ຮຽນຮູ້ການຕຳ່ຫູກ ແລະ ການຜະລິດເຫຼົ້າຂາວ, ເມືອງໄດ້ຈັດຕັ້ງກຸ່ມແລ້ວ 8 ກຸ່ມ.

II. ຢ້ຽມຢາມເປົ້າໝາຍທຸລະກິດຂະໜາດນ້ອຍ ແລະ ກາງ

ໄດ້ປຶກສາຫາລືກ່ຽວກັບບັນດາບັນຫາເຫຼົ່ານີ້:

1) ສູນຫັດຖະກຳເຄື່ອງປັ້ນດິນເຜົາບ້ານຈ່ານເໜືອ

ການເບິ່ງແຍງຮັກສາສິ່ງອຳນວຍຄວາມສະດວກພາຍໃນສູນເຊັ່ນ ຫ້ອງນໍ້າ, ຫ້ອງວາງສະແດງສິນຄ້າ, ອາຄານສາທິດ, ການຕໍ່ເຕີມອາຄານ, ການບໍລິການກາເຟຢູ່ຫ້ອງຂໍ້ມູນຂ່າວສານການທ່ອງທ່ຽວ, ການສ້າງເຕົາເຜົາເພີ່ມເຕີມ, ການຮັກສາຄວາມສະອາດ ແລະ ຄວາມເປັນລະບຽບຮຽບຮ້ອຍ ແລະ ອື່ນໆ

2) ບ້ານປາກອູ, ເມືອງປາກອູ

ການຄຸ້ມຄອງ, ໃຫ້ບໍລິການ ແລະ ບຳລຸງຮັກສາສິ່ງອຳນວຍຄວາມສະດວກທີ່ໂຄງການໄດ້ສ້າງຂຶ້ນເຊັ່ນ ບ່ອນຈອດລົດ, ຫ້ອງນໍ້າ ແລະ ຫ້ອງຂໍ້ມູນຂ່າວສານ, ການປັບປຸງລະບຽບວ່າດ້ວຍການຄຸ້ມຄອງຈັດສັນບ່ອນຈອດລົດພາຍໃນບ້ານ, ບັນຫາການຂາຍເຄື່ອງບໍ່ເປັນລະບຽບແລະ ເດັກນ້ອຍຂໍທອນຢູ່ຖໍ້າຕິ່ງ, ການຈັດວາງ ແລະ ທຳຄວາມສະອາດບ່ອນຈັດວາງພະພຸດທະຮູບ ແລະ ອື່ນໆ

3) ບ້ານຊ່າງໄຫ, ເມືອງປາກອູ

ການຄຸ້ມຄອງ, ໃຫ້ບໍລິການ ແລະ ບຳລຸງຮັກສາສິ່ງອຳນວຍຄວາມສະດວກທີ່ໂຄງການໄດ້ສ້າງຂຶ້ນເຊັ່ນ ບ່ອນຈອດລົດ, ຫ້ອງນໍ້າ ແລະ ຫ້ອງຂໍ້ມູນຂ່າວສານ, ການປັບປຸງລະບຽບວ່າດ້ວຍການຄຸ້ມຄອງຈັດສັນບ່ອນຈອດລົດພາຍໃນບ້ານ, ການເຮັດທາງມ້າລາຍ ແລະ ເຮັດຄື້ນຫຼຸດຜ່ອນຄວາມໄວໃກ້ບ່ອນຈອດລົດ ແລະ ພາຍໃນບ້ານ.

ຫຼັງຈາກນັ້ນ, ໂຄງການຂັ້ນສູນກາງ ແລະ PIU ແຂວງຫຼວງພະບາງ ກໍໄດ້ປະຊຸມປຶກສາຫາລືກ່ຽວກັບແຜນກິດຈະກຳຂອງໂຄງການປະຈຳປີ 2023.