Public and private sector visited sub-project site and attend meeting on Kaeng Nyui Waterfall site management, operation and maintenance

ພາກລັດ ແລະ ພາກທຸລະກິດຢ້ຽມຢາມເຂດກໍ່ສ້າງ ແລະ ເຂົ້າຮ່ວມກອງປະຊຸມປຶກສາຫາລືການບໍລິຫານຄຸ້ມຄອງສະຖານທີ່ທ່ອງທ່ຽວນຳ້ຕົກຕາດແກ້ງຍຸຍ, ເມືອງວັງວຽງ, ແຂວງວຽງຈັນ

ວັນພຸດ ທີ 20 ທັນວາ 2023 ທີ່ຜ່ານມາ, ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງວັງວຽງ ຮ່ວມກັບກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ນຳພາພາກລັດ ແລະ ພາກທຸລະກິດໄປຢ້ຽມຢາມເຂດກໍ່ສ້າງ ແລະ ເຂົ້າຮ່ວມກອງປະຊຸມປຶກສາຫາລືການບໍລິຫານຄຸ້ມຄອງສະຖານທີ່ທ່ອງທ່ຽວນຳ້ຕົກຕາດແກ້ງຍຸຍ, ເມືອງວັງວຽງ, ແຂວງວຽງຈັນ ໂດຍການສະໜັບສະໜູນຂອງໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງ ໄລຍະ 2 (ຄພສທ 2) Second GMS Tourism Infrastructure for Inclusive Growth Project – TIIGP 2, ກະຊວງ ຖວທ, ທະນາຄານພັດທະນາອາຊີ.

ຈຸດປະສົງແມ່ນເພື່ອເຮັດໃຫ້ພາກລັດ ແລະ ພາກທຸລະກິດ ໄດ້ເຫັນສະພາບຄວາມຄືບໜ້າຕົວຈິງຂອງການກໍ່ສ້າງ, ກາລະໂອກາດທາງທຸລະກິດ ແລະ ປຶກສາຫາລືກ່ຽວກັບບັນດາທາງເລືອກໃນການບໍລິຫານຄຸ້ມຄອງສະຖານທີ່ທ່ອງທ່ຽວນຳ້ຕົກຕາດແກ້ງຍຸຍ.

ກອງປະຊຸມໄດ້ດຳເນີນໂດຍການເປັນທານຂອງ ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ, ຜູ້ຈັດການໂຄງການ ຄພສທ 2, ກະຊວງ ຖວທ, ທ່ານ ສູນ ມະນີວົງສ໌, ຫົວໜ້າໂຄງການ ຄພສທ 2, ກະຊວງ ຖວທ ແລະ ທ່ານ ກວຽນທອງ ເທບທິດາ, ຮອງເຈົ້າເມືອງໆວັງວຽງ.

ຜູ້ເຂົ້າຮ່ວມຈາກພາກລັດແມ່ນປະກອບມີ ກະຊວງ ຖວທ, ພະແນກ ຖວທ ແຂວງວຽງຈັນ, ຫ້ອງການ ຖວທ ເມືອງວັງວຽງ ແລະ ຂະແໜງການກ່ຽວຂ້ອງ. ມີບັນດາພາກທຸລະກິດພາຍໃນເມືອງວັງວຽງ ແລະ ຈາກນະຄອນຫຼວງວຽງຈັນ ແລະ ອຳນາດການປົກຄອງບ້ານນາດ້ວງເຂົ້າຮ່ວມ.

ທ່ານ ວິລະ ຈັນທະວົງ, ຊ່ຽວຊານໂຄງການຂະແໜງການທ່ອງທ່ຽວ ໄດ້ນຳສະເໜີກ່ຽວກັບການປັບປຸງໂຄງລ່າງພື້ນຖານ ແລະ ສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ. ຫຼັງຈາກນັ້ນ, ທ່ານ ນາງ ໃບທອນ ລໍວັນໄຊ, ຊ່ຽວຊານພາຍໃນດ້ານການສ້າງຂີດຄວາມສາມາດດ້ານອົງການຈັດຕັ້ງ ໄດ້ນຳສະເໜີກ່ຽວກັບບັນດາໜ້າວຽກໃນການຄຸ້ມຄອງ ແລະ ບົວລະບັດຮັກສາສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ.

ຜູ້ເຂົ້າຮ່ວມໄດ້ຮັບຟັງກ່ຽວກັບບັນດາທາງເລືອກໃນການບໍລິຫານຄຸ້ມຄອງສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ ແລະ ໄດ້ເຫັນດີໃຫ້ມີການຮ່ວມມືລະຫວ່າງພາກລັດ, ພາກທຸລະກິດ ແລະ ປະຊາຊົນ ເພື່ອເຮັດໃຫ້ສາມາດນຳໃຊ້ ແລະ ບົວລະບັກຮັກສາໂຄງລ່າງພື້ນຖານ ແລະ ສິ່ງອຳນວຍຄວາມສະດວກ ແລະ ພັດທະນາສະຖານທີ່ທ່ອງທ່ຽວໃຫ້ມີຄວາມຍືນຍົງ ພ້ອມທັງຮັກສາສິດຜົນປະໂຫຍດຂອງປະຊາຊົນທ້ອງຖິ່ນ.

ດາວໂຫຼດເອກະສານກອງປະຊຸມ: https://bit.ly/49ZhmFB