SMEs Need Assessment on Don Ded – Don Khone, Khong District

ໃນລະຫວ່າງວັນທີ 15 – 16 ສິງຫາ 2022, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບ ພະແນກ ຖວທ ແຂວງຈຳປາສັກ ໄດ້ລົງປະເມີນຄວາມຕ້ອງການຂອງທຸລະກິດຂະໜາດນ້ອຍ ແລະ ກາງຢູ່ດອນເດດ ແລະ ດອນຄອນ, ນັບທັງຄອບຄົວທີ່ໄດ້ຮັບຜົນກະທົບຈາກການຍົກຍ້າຍຈັດສັນເພື່ອການກໍ່ສ້າງເສັ້ນທາງ ແລະ ປັບປຸງທ່າເຮືອນາກະສັງ, ເມືອງໂຂງ, ແຂວງຈຳປາສັກ.

ຈຸດປະສົງແມ່ນເພື່ອປະເມີນຄວາມຕ້ອງການຂອງທຸລະກິດໂຮງແຮມ, ເຮືອນພັກ, ຮ້ານອາຫານ, ທຸລະກິດທ່ອງທ່ຽວ ແລະ ລົດ ແລະ ເຮືອຂົນສົ່ງໂດຍສານ ທາງດ້ານການຝຶກອົບຮົມ, ການພັດທະນາຜະລິດຕະພັນ ແລະ ການບໍລິການ, ການຕະຫຼາດ ແລະ ຄວາມຕ້ອງການທາງດ້ານອຸປະກອນເພື່ອຍົກລະດັບຄຸນນະພາບ, ຄວາມຫຼາກຫຼາຍ ແລະ ຄວາມປອດໄພຂອງຜະລິດຕະພັນ ແລະ ການບໍລິການ.

ກອງປະຊຸມໄດ້ດຳເນີນໂດຍການເປັນປະທານຂອງ ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ, ກະຊວງ ຖວທ ເຊິ່ງທັງເປັນຜູ້ຈັດການໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນຳ້ຂອງໄລຍະ 2 ແລະ ທ່ານ ສຸລິນ ເພັດທານີ, ຮອງຫົວໜ້າພະແນກ ຖວທ ແຂວງຈຳປາສັກ ແລະ ທັງເປັນຫົວໜ້າໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນຳ້ຂອງໄລຍະ 2 ແຂວງຈຳປາສັກ.

ຜູ້ເຂົ້າຮ່ວມໄດ້ຮັບຟັງການນຳສະເໜີການປັບປຸງໂຄງລ່າງພື້ນຖານ ແລະ ສິ່ງອຳນວຍຄວາມສະດວກຢູ່ເຂດນາກະສັງ, ດອນເດດ ແລະ ດອນຄອນ ເຊິ່ງປະກອບມີການປັບປຸງເສັ້ນທາງເຂົ້າຫາທ່າເຮືອນາກະສັງ, ເສັ້ນທາງຢູ່ດອນເດດ ແລະ ດອນຄອນ, ທ່າເຮືອ, ຂົວ, ບ່ອນຈອດລົດ ແລະ ອື່ນໆ.

ຫຼັງຈາກນັ້ນ, ຜູ້ເຂົ້າຮ່ວມກໍໄດ້ປະກອບຄຳເຫັນຢ່າງຕັ້ງໜ້າກ່ຽວກັບຄວາມຕ້ອງການຂອງຕົນເອງ ເພື່ອປັບປຸງທຸລະກິດ ແລະ ເຮັດໃຫ້ນັກທ່ອງທ່ຽວເຂົ້າມາຢ້ຽມຢາມດອນເດດ-ດອນຄອນ ຫຼາຍຍິ່ງຂຶ້ນໃນອະນາຄົດ.